Tetun: PM TAUR MATAN RUAK ORIENTA MOP-IJE LOKE ESTRADA KONEKSAUN METIAUT- KAMEA

DILI, 23 JULLU 2021: S. Exa, Primeiru Ministru (PM), Sr. Taur Matan Ruak, akompaña husi S. Exa, Ministru Obras Públikas (MOP), Arq. Salvador Eugénio Soares dos Reis Pires, no Prezidente Institutu Jestaun Ekipamentus (IJE), Sra. Hermenegilda da Costa Laurentina, observa direita tereñu ba koneksaun estrada husi suku Metiaut liga ba to’o Kamea iha área foho leten Kamea nian. Xefe Governu hatete estrada refere iha tempu Governu anteriór nian Sekretáriu Estadu Formasaun Polítika no Empregu (SEFOPE) loke ona maibé to’o de’it iha foho klaran la konsege to’o iha foho leten kuaze kilometru 1 resin mak sei hela, tanba ne’e orienta MOP no IJE hodi hatutan no loke hodi halo koneksaun liga Metiaut ba Kamea. “Estrada ida-ne’e uluk SEFOPE mak loke maibé falta kilómetru 1 liu, ha’u-nia hanoin ne’e imi loke liga tiha (halo koneksaun estrada husi Metiaut to’o Kemea iha foho leten),”S. Exa, Sr. Primeiru Ministru orienta MOP no IJE bainhira hala’o vizita ba tereñu iha suku Metiaut, postu administrativu Kristu Rei, Dili. Iha oportunidade ne’e, Sr. Primeiru Ministru mós fó apresiasaun ba servisu MOP no IJE liuliu ekipa tékniku sira ne’ebé halo servisu maka’as hodi halo mudansa iha mandatu oitavu (VIII) Governu Konstitusionál nian, liuliu inisia loke estrada ba área rurál sira. “Ha’u apresia imi-nia servisu, ha’u la’os dehan ha’u foin Primeiru Ministru ba Governu ida-ne’e mak apresia imi-nia servisu, ha’u uluk sei Prezidente ha’u haree tanba ne’e mak ha’u mai ne’e haree iha diferénsia ida i kontinua nafatin hanesan ne’e,”Xefe Governu apresia. Iha fatin hanesan, S. Exa, Ministru Obras Públikas (MOP), Arq. Salvador Eugénio Soares dos Reis Pires, informa vizita tereñu ne’e hodi loke estrada foun iha área Metiaut nian liga ho Kamea. “Ohin Sr. Primeiru Ministru konvida ha’u ho Sra. Prezidente IJE mai haree hela dalan ligasaun Metiaut ba Kemea ne’ebé uluk Governu anteriór loke balun ona, no iha posibilidade para atu halo abertura foun atu nune’e bele halo koneksaun ba estrada ne’ebé ejiste ona iha Kamea, nune’e ligasaun Kamea ho Metiaut bele iha dalan korta (dalan liuhosi foho leten husi Metiaut to’o Kamea nian). Ida-ne’e mak ohin ita lori ho Sra. Prezidente ho nia ekipa no mós Diresaun Nasionál Estrada, Sr. Diretór ho nia ekipa, xefe departamentu no tékniku sira para atu haree posibilidade, horsida sira sei koordena ho nai Liurai atu identifika pontu de abertura ne’e husi ne’ebé,”Sr. Ministru Obras Públikas informa ba jornalista sira hafoin observa tereñu. Sr. Ministru hatutan, normalmente kona-ba loke estrada foun IJE hanesan Institutu Públiku iha prosedimentu ka prosesu administrativa sira antes loke estrada foin mak hanesan presiza rekolla dadus, halo avaliasaun kustu no mós planu ba ekipamentus ne’ebé tenke uza, tipu ekipamentus hodi nune’e bele loke estrada foun halo koneksaun husi Metiaut ba Kamea. Nune’e mós Prezidente IJE, Sra. Hermenegilda da Costa Laurentina, ekipa IJE sei ba fali iha tereñu hodi foti dadus antes mobiliza ekipamentu pezadus ba tereñu hodi halo servisu. “Ohin S. Exa, Sr. Primeiru Ministru no Sr. Ministru Obras Públikas ami mai hamutuk haree estrada diresaun Metiaut ba Kamea, no ha’u hanoin ohin ekipa husi obras públikas nian, inklui parte IJE ho nia ekipa haree tiha ona no ami mós rona orientasaun husi S. Exa, Sr. Primeiru Ministru no Sr. Ministru iha posibilidade tempu badak ekipa husi IJE ho enjinéiru sira sei foti dadus depois de foti dadus mak ita foin hatene, relata fila-fali relatóriu survey para ita bele hatene katak servisu refere presiza tempu hira, presiza mákina tipu saida-saida, ami sei prepara sira-nia osan han, no seluk tan, bainhira ekipa sira preparadu ona administrativu kompletu ona ami bele mai ona halo servisu,”Sra. Prezidente IJE, informa.

Observasaun tereñu ne’e, akompaña mós husi Diretór Nasionál Estrada, Ponte no Kontrolu i Seias (DNEPCC), Sr. Nene Lobato, ho ekipa tékniku sira, ekipa tékniku husi Gabinete MOP no IJE nian.